Luk 17 | BOJ | STEP | Yesus a anjam degsi marsiq kobotosiqa aqa aŋgro naŋgi endegsi minjrej, “Kumbra qudei na tamo uŋgasari naŋgi uneq breinjroqnqas. Bole, kumbra di brantoqnqas. Ariya tamo a kumbra di babtoqnqas qaji a tulaŋ padalougetqas.

Luke 17

Tamo bei na Yesus aqa aŋgro kiñala bei uneq waiyqas di a tulaŋ padalougetqas

1 Yesus a anjam degsi marsiq kobotosiqa aqa aŋgro naŋgi endegsi minjrej, “Kumbra qudei na tamo uŋgasari naŋgi uneq breinjroqnqas. Bole, kumbra di brantoqnqas. Ariya tamo a kumbra di babtoqnqas qaji a tulaŋ padalougetqas. 2 Tamo dena ijo aŋgro kiñala endego bei e qa aqa areqalo siŋgilatqo qaji di osim uneq waiyqas di uge. Tamo qudei naŋgi na tamo di ojsib meniŋ kobaquja osib sil na aqa kakoroq di tontosib waiyib ya robuq aisim moiqas di kere. Deqa niŋgi segi segi geregere ŋam atsib soqniye.

3 “Ino was bei a une bei atimqa ni na minje, ‘Une di urat.’ Yim a ino anjam di qusim are bulyimqa ni aqa une di torei moiotime. 4 Ariya a na une 7-pela ni emoqnsim bati qujai deqa olo boqnsim ni mermoqnqas, ‘O was, e kumbra grotonum.’ Degsi mermo 7-pelatimqa ni aqa une kalil di torei moiotime.”

Yesus na aqa aŋgro naŋgo areqalo siŋgilatetnjrqajqa deqa minjeb

5 Onaqa Yesus aqa aŋgro nami giltnjrej qaji naŋgi na Yesus minjeb, “O Tamo Koba, ni na gago areqalo siŋgilatetgimqa iga ni qa gago areqalo geregere siŋgilatsim sqom.” 6 Onaqa Tamo Koba Yesus na kamba minjrej, “Nuŋgo areqalo e qa siŋgilato qaji di sis yago bul kiñala sqas di kereqas. Degesqas di niŋgi subar endi minjibqa a nuŋgo anjam dauryosim jirim qoji waqosim aisim yuwalq di tigelqas.”

Yesus a wau tamo aqa kumbra qa anjam marej

7 Yesus a naŋgi anjam degsi minjrsiqa olo yawo anjam bei endegsi minjrej, “Tamo bei na aqa wau tamo bei qariŋyim gilsimqa aqa kaja naŋgi taqatnjroqnqas kio aqa iŋgi wauq gilsimqa dia mandam qamsim bulyoqnqas kio ariya a wau di kobotimqa aqa tamo koba na endegsi minjqasai, ‘Ni namo iŋgi uye.’ Degyqasai. 8 A minjqas, ‘Ni ijo iŋgi goietbosim gara tigsimqa iŋgi suweiyosim ebimqa iŋgi ti ya ti uyqai. Uyit menetbimqa bunu ni kamba iŋgi ti ya ti uyqam.’ Aqa wau tamo degsi minjqas. Di kiyaqa? A wau tamo laŋaj deqa. 9 Deqa a na aqa tamo koba aqa anjam qusim dauryoqnimqa aqa tamo koba na aqa ñam soqtetqasai. ‘Ni keretsimqa ijo wau ojonum’ degsi minjqasai. Di kiyaqa? A wau tamo laŋaj deqa. 10 Deqa niŋgi dego Qotei aqa wau tamo sosibqa wau kalil a na niŋgi eŋgoqnqas qaji di yoqniye. Yoqnsib mariye, ‘Iga wau tamo laŋaj. Deqa wau kalil Qotei na egeqnu qaji agi wau yeqnum.’”

Yesus a na tamo 10-pela naŋgo jejamu yu na ugeeleŋej qaji naŋgi boletnjrej

11 Yesus a dena tigelosiqa Jerusalem aiqajqa gam dauryosiqa Samaria sawa ti Galili sawa ti ambleq dena walwelosi aioqnej. 12 Aioqnsiq qure beiq di brantej. Onaqa tamo 10-pela naŋgo jejamu yu na ugeeleŋej qaji naŋgi bosib gamq dia Yesus itosibqa naŋgi kiñala isaq di tigelosib tulaŋ koba maosib minjeb, “O Tamo Koba Yesus, ni iga qa are ugeimimqa aqaryaige.” 14 Onaqa Yesus a naŋgi unjrsiqa minjrej, “Niŋgi olo puluosi aisib nuŋgo jejamu atra tamo naŋgi osornjriye.” Degsi minjrnaqa naŋgi aioqnsibqa gamq dia naŋgo yu kalil koboonaqa naŋgo jejamu boleonaq uneb. 15 Onaqa naŋgo ambleq dena qujai a segi olo puluosiqa Yesus aqa areq gilej. A tulaŋ koba leleŋoqnsiqa Qotei aqa ñam soqtoqnsiq giloqnej. 16 Gilsiq Yesus aqa siŋgaq dia siŋga pulutosiqa biŋiyosiq minjej, “O Tamo Koba, ni keretsimqa ijo jejamu boletonum.” Tamo di a Samaria qaji. 17 Onaqa Yesus a tamo di unsiqa marej, “E na tamo 10-pela naŋgo jejamu boletetnjronumqa ariya qujai a segi ijoq bqo. Tamo 9-pela naŋgi qabi unub? 18 Naŋgi ijoq olo bosai. Naŋgi Qotei aqa ñam soqtosai dego. Sawa bei qaji tamo endi a segi qujai olo bosiq Qotei aqa ñam soqtqo.” 19 Yesus a degsi marsiqa tamo di minjej, “Ni tigelosim gile. Ni ino areqalo e qa siŋgilatonum deqa ino jejamu boleqo.”

Mondoŋ Tamo Aŋgro a laŋ qureq na bqas

20 Bati bei Farisi naŋgi na Yesus endegsib nenemyeb, “Bati gembu Qotei a bosim aqa segi tamo uŋgasari naŋgo Mandor Koba sosim naŋgi taqatnjrqas?” Onaqa Yesus na minjrej, “Qotei a tamo naŋgo Mandor Koba sqa bati di brantimqa kumbra bei namoqna brantqasai. Deqa nuŋgo ŋamdamu na kumbra bei namoqna unsib dena poiŋgwasai. 21 Tamo bei na bosim endegsi merŋgwasai, ‘Niŋgi uniye, Qotei na iga taqatgwa bqo agiende,’ o ‘Qotei bqo agide.’ Degyqasai. Niŋgi quiye. Qotei a nami bosiq nuŋgo ambleq endi Mandor Koba sosiq niŋgi taqatŋgeqnu.”

22 Yesus a anjam degsi marsiq kobotosiqa aqa aŋgro naŋgi endegsi minjrej, “Bati bei bamqa niŋgi e Tamo Aŋgro olo bqajqa bati unqajqa maroqnqab. Ariya niŋgi bati di unqasai. 23 Tamo qudei naŋgi na niŋgi gisaŋgoqnsib merŋgoqnqab, ‘Niŋgi uniye. Tamo Koba bqo agide,’ o ‘Tamo Koba bqo agiende.’ Degsib merŋgoqnibqa niŋgi naŋgi daurnjraib. 24 Kola minjaleqnaqa laŋ kalil suwaŋeqnu. Dego kere e Tamo Aŋgro brantitqa tamo uŋgasari kalil naŋgi e nubqab. 25 Ariya namoqna e jaqatiŋ koba oqai. Amqa tamo uŋgasari bini bati endeqa unub qaji naŋgi na e qoreibqab.

26 “Noa aqa bati qa tamo uŋgasari naŋgi kumbra yoqneb dego kere e Tamo Aŋgro bqajqa bati qa naŋgi kumbra degyoqnqab. 27 Agi Noa aqa bati qa naŋgi kalil iŋgi uyoqnsib ya uyoqnsib uŋa baŋ ojeleŋoqnsib sonabqa Noa a qobuŋ miligiq gilnaqa awa koba aisiqa mandam ya maqonaqa tamo kalil moreŋekriteb. 28 Lot aqa bati qa dego tamo uŋgasari naŋgi iŋgi uyoqnsib ya uyoqnsib iŋgi iŋgi awaiyeleŋoqnsib silali oqnsib iŋgi yageleŋoqnsib tal ateleŋoqneb. Naŋgi kumbra degyoqnsib sonabqa Lot a Sodom qure uratosiq ulaŋeqnaqa ŋamyuo ti meniŋ puloŋ ti laŋ goge dena awa bul aisiqa Sodom tamo uŋgasari kalil naŋgi padaltnjrej. 30 Dego kere tamo uŋgasari naŋgi kumbra degyoqnsib soqnibqa e Tamo Aŋgro brantqai.

31 “Gulube aqa bati di brantimqa tamo naŋgi tal meq di unub qaji naŋgi jaraiqa oqnsib iŋgi iŋgi oqa osibqa olo warum miligiq gilaib. Naŋgi jaraioqujatebe. Tamo naŋgi wauq di unub qaji naŋgi jaraiqa oqnsib iŋgi iŋgi oqa osibqa olo puluosib qureq baib. Naŋgi dena torei jaraioqujatebe. 32 Kumbra nami Lot aqa ŋauqali aqaq di brantej qaji niŋgi deqa are qaliye. 33 Tamo bei a aqa segi ŋambile qa areqalo kobaiyqas di a padalqas. Ariya tamo bei a aqa segi ŋambile uratqas di a olo ŋambile bole oqas.

34 “E na niŋgi endegsi merŋgwai. Ijo bqajqa bati brantimqa qolo deqa tamo aiyel bijal qujaiq di ŋereŋesoqnibqa Qotei na bei laŋ qureq osi oqsimqa bei uratim sqas. 35 Uŋa aiyel tal qujaiq dia saplaŋ gereiyoqnibqa Qotei na bei laŋ qureq osi oqsimqa bei uratim sqas. 36 Tamo aiyel wau qujaiq dia iŋgi yagoqnibqa Qotei na bei laŋ qureq osi oqsimqa bei uratim sqas.” Yesus a na aqa aŋgro naŋgi anjam degsi minjrej. 37 Onaqa naŋgi na kamba Yesus nenemyeb, “O Tamo Koba, kumbra kalil di sawa qabia brantqas?” Onaqa Yesus na minjrej, “Wagme naŋgi qusaonub qaji sawa dia qal naŋgi koroqab.”